اسلام آباد: (رائیٹ ناؤ نیوز) بین الاقوامی کشیدگی اور تیل کی قیمتوں میں اضافے کے پیش نظر وفاقی حکومت نے ملک میں کفایت شعاری اقدامات دوبارہ نافذ کرنے پر غور شروع کر دیا ہے۔ حکومت نے معاشی صورتحال کو مد نظر رکھتے ہوئے مختلف تجاویز پر کام شروع کر دیا ہے۔

ذرائع کے مطابق وزیراعظم کی ہدایت پر سرکاری اخراجات کو محدود کرنے کے لیے نئی تجاویز زیر غور ہیں۔ ان میں ورک فرام ہوم پالیسی دوبارہ متعارف کرانے اور سرکاری گاڑیوں کے استعمال پر پابندیاں شامل ہیں۔

متعلقہ وزارتیں ان تجاویز پر عملدرآمد کے لیے طریقہ کار کو حتمی شکل دے رہی ہیں۔ رواں یا آئندہ ہفتے ان اقدامات کے حوالے سے نئی ہدایات جاری ہونے کا امکان ہے۔

حکومتی ذرائع کے مطابق ان تجاویز کی منظوری کے بعد باقاعدہ نوٹیفکیشن جاری کیا جائے گا۔ کچھ کفایت شعاری اقدامات پہلے ہی مارکیٹوں میں نافذ ہو چکے ہیں۔

یاد رہے کہ ایران اور امریکا کے درمیان کشیدگی اور تیل کی قیمتوں میں اضافے کی وجہ سے ملکی معیشت پر دباؤ بڑھ رہا ہے۔ ایسے میں کفایت شعاری اقدامات معیشت کے استحکام کے لیے اہم سمجھے جا رہے ہیں۔