تہران: (رائیٹ ناؤنیوز) ایرانی پاسدارانِ انقلاب نے امریکی ففتھ فلیٹ ہیڈکوارٹر اور ائیربیس پر میزائل اور ڈرون حملے کا دعویٰ کیا ہے۔ یہ کارروائی آبنائے ہرمز کے قریب ایرانی مفادات پر مبینہ امریکی حملوں کے جواب میں کی گئی۔

ایرانی میڈیا نے پاسدارانِ انقلاب کے بیان کو نقل کرتے ہوئے بتایا ہے کہ یہ حملے گزشتہ رات شروع ہوئے جب ایرانی آئل ٹینکر کو نشانہ بنایا گیا۔ اس واقعے میں جہاز کے انجن روم کو نقصان پہنچا۔

پاسدارانِ انقلاب کے مطابق، امریکی فوج کے جارحانہ اقدام کے بعد، ایرانی بحریہ نے جوابی کارروائی کی اور امریکی جہاز ‘پانایا’ کو میزائلوں سے نشانہ بنایا۔

بیان میں مزید کہا گیا کہ امریکی فوج نے جزیرہ قشم کے جنوبی حصے میں ایرانی مواصلاتی ٹاور پر حملہ کیا جس کے بعد ایرانی ایرو اسپیس فورس نے جوابی کارروائی کی۔

واضح رہے کہ ایران نے پہلے ہی کسی بھی امریکی جارحیت کا سخت جواب دینے کی وارننگ دی تھی۔ اس واقعے کے بعد ایران کی جانب سے جاری ویڈیو نے بین الاقوامی سطح پر تشویش پیدا کی ہے۔