اسلام آباد: (رائیٹ ناؤ نیوز) وزیراعظم شہباز شریف نے خوشحال گڑھ پل پر دہشت گردی ناکام بنانے والے شہید لیاقت کو خراج تحسین پیش کیا ہے۔ شہید لیاقت نے پنجاب اور خیبرپختونخوا کے جنڈ اور کوہاٹ کے قریب بڑی دہشت گردی کو ناکام بنایا۔

وزیراعظم نے اپنے بیان میں کہا کہ لیاقت نے مشتبہ شخص کو روکا، جس پر دہشت گرد نے خود کو دھماکے سے اڑا لیا۔ اس واقعے میں لیاقت نے جام شہادت نوش کیا اور بڑا نقصان روکنے میں کامیاب ہوئے۔

وزیراعظم نے کہا کہ شہید لیاقت کی جرات اور حب الوطنی کو ہمیشہ یاد رکھا جائے گا۔ ان کی قربانی قوم کے لیے مشعل راہ ہے اور وہ دہشت گردی کے خلاف قومی عزم کی علامت ہیں۔

کو شہباز شریف نے مزید کہا کہ ایسے بہادر شہری قوم کا اثاثہ ہیں۔ قوم دہشت گردی کے خلاف اپنی سکیورٹی فورسز کے ساتھ کھڑی ہے اور ہمیشہ دشمن کے عزائم کو ناکام بنائے گی۔

یاد رہے کہ شہید لیاقت نے اپنی جان کا نذرانہ پیش کر کے بڑی تباہی کو روکا اور ان کی قربانی کو کبھی فراموش نہیں کیا جائے گا۔ وزیراعظم نے ان کے درجات کی بلندی کے لیے دعا کی۔