اسلام آباد: (رائیٹ ناوٴ نیوز) الیکشن کمیشن آف پاکستان میں وزیر مملکت داخلہ طلال چوہدری اور ان کے بھائی بلال چوہدری کے خلاف انتخابی ضابطہ اخلاق کی خلاف ورزی کے کیس کی سماعت ہوئی۔ چیف الیکشن کمشنر کی زیر صدارت پانچ رکنی بینچ نے سماعت کی۔

سماعت کے دوران اسپیشل سیکریٹری ظفر اقبال نے بتایا کہ 10 نومبر کو تین شکایات موصول ہوئیں جن میں طلال چوہدری پر اپنے بھائی کے لیے اثر و رسوخ استعمال کرنے کا الزام تھا۔ چیف الیکشن کمشنر نے اسپیشل سیکریٹری کی سرزنش کی اور ڈسٹرکٹ مانیٹرنگ افسر کے خلاف کارروائی کا حکم دیا۔

الیکشن کمیشن نے فیصل آباد کے ڈی ایم او کے خلاف انکوائری کرنے کا حکم دیا۔ وکیل طلال چوہدری نے کہا کہ ان کے پاس میڈیا رپورٹس کی ٹرانسکرپٹ موجود نہیں، جس پر چیف الیکشن کمشنر نے ٹرانسکرپٹ فراہم کرنے کا حکم دیا۔ کیس کی مزید سماعت 8 جنوری تک ملتوی کر دی گئی۔