اسلام آباد: (رائیٹ ناوٴ نیوز) اسلام آباد ہائیکورٹ میں طارق محمود جہانگیری کی ڈگری تنازع پر چیف جسٹس سرفراز ڈوگر اور جسٹس اعظم خان کی سربراہی میں سماعت ہوئی۔ کراچی یونیورسٹی کے رجسٹرار عمران صدیقی نے عدالت کے سامنے اوریجنل ریکارڈ پیش کیا، جبکہ جسٹس طارق جہانگیری کے وکیل اکرم شیخ اور بیرسٹر صلاح الدین بھی عدالت میں موجود تھے۔

رجسٹرار نے عدالت کو بتایا کہ کراچی یونیورسٹی نے طارق جہانگیری کی ڈگری منسوخ کر دی ہے، تاہم سندھ ہائیکورٹ نے اس فیصلے کو معطل کر رکھا ہے۔ اکرم شیخ نے عدالت میں موقف اختیار کیا کہ ان کی درخواستوں پر فیصلہ کئے بغیر ریکارڈ نہیں دیکھا جا سکتا۔

پرنسپل اسلامیہ لا کالج نے بھی عدالت میں کہا کہ طارق محمود جہانگیری ان کے طالب علم نہیں تھے۔ رجسٹرار کے مطابق، طارق محمود نے جعلی انرولمنٹ فارم استعمال کر کے ڈگری حاصل کی۔

کراچی یونیورسٹی کے رجسٹرار نے بتایا کہ طارق محمود کو 1990 میں امتحانات میں نقل کرنے پر تین سال کی پابندی لگی تھی، لیکن انہوں نے پابندی کے خلاف کارروائی کرتے ہوئے جعلی انرولمنٹ فارم استعمال کیا۔

عدالت نے کیس کی مزید سماعت کے لئے رجسٹرار کراچی یونیورسٹی سے حتمی فیصلہ طلب کیا، جبکہ عدالت نے سماعت ملتوی کر دی۔