بیجنگ: (رائیٹ ناوٴ نیوز) چین کی آن لائن شاپنگ انڈسٹری کو حالیہ دنوں میں ایک نئے فراڈ کی لہر نے متاثر کیا ہے، جہاں صارفین اے آئی کی مدد سے جعلی تصاویر بنا کر غیر قانونی ریفنڈ حاصل کر رہے ہیں۔

چینی قوانین کے مطابق صارفین کو ریفنڈ کا حق ملتا ہے اگر وہ خریدا گیا سامان خراب ثابت کر سکیں، لیکن کئی صارفین اے آئی ٹولز کی مدد سے تصاویر میں ترمیم کر کے مصنوعات کو نقصان زدہ ظاہر کر رہے ہیں۔

جیایشنگ شہر کے پھل اور سبزی فروش نے بتایا کہ ان کے پاس جعلی ریفنڈ کی درخواستیں آ رہی ہیں اور ابتدائی طور پر صارفین پر اعتماد کیا گیا، لیکن درخواستوں میں اضافے سے شک پیدا ہوا۔

کئی آن لائن پلیٹ فارمز نے ڈیجیٹل ترمیم کی نشاندہی کے لیے اے آئی ڈیٹیکشن ٹولز متعارف کرائے ہیں، مگر ماہرین کے مطابق یہ ٹولز مکمل طور پر قابل اعتماد نہیں ہیں۔

ستمبر 2025 میں چین میں اے آئی سے بنائی گئی تصاویر پر واضح واٹرمارک یا لیبل لازمی قرار دیا گیا ہے، لیکن ماہرین کا کہنا ہے کہ ان پابندیوں کو نظرانداز کیا جا سکتا ہے، جس سے فراڈ کا خطرہ بدستور موجود ہے۔