بیجنگ: (رائیٹ ناوٴ نیوز) فرانس کے صدر ایمانوئل میکرون نے چین کے صدر شی جن پنگ سے ملاقات کے دوران یوکرین جنگ کے خاتمے، عالمی تجارت کے توازن اور ماحولیات کے مسائل پر تعاون کی اپیل کی۔ میکرون اپنے چوتھے سرکاری دورے پر چین میں موجود ہیں، جہاں ان کے ساتھ فرانسیسی کاروباری شخصیات بھی شامل ہیں۔

میکرون نے کہا کہ موجودہ عالمی صورتحال میں چین اور فرانس کے درمیان مضبوط مکالمے کی ضرورت پہلے سے زیادہ بڑھ گئی ہے۔ دوسری جانب چین کے صدر شی نے کہا کہ دونوں ممالک کو اسٹریٹیجک خود مختاری کا مظاہرہ کرنا چاہیے اور چین یوکرین اور غزہ میں قیامِ امن کے لیے کوششیں جاری رکھے گا۔

دورے کے دوران دونوں ممالک نے نیوکلیئر انرجی، سرمایہ کاری اور آرٹیفیشل انٹیلیجنس سمیت 12 معاہدوں پر دستخط کیے ہیں۔ اگرچہ فرانسیسی وفد بڑے تجارتی معاہدوں کی امید رکھتا تھا، لیکن عالمی تجارتی کشیدگی کے باعث بڑے معاہدے ممکن نہ ہوسکے۔

چین اور فرانس کے درمیان تجارتی عدم توازن میں مسلسل اضافہ ہو رہا ہے، جہاں چین فرانس سے سالانہ 35 ارب ڈالر اور فرانس چین سے تقریباً 45 ارب ڈالر کی مصنوعات درآمد کرتا ہے۔ میکرون نے تجارتی نظام کو زیادہ منصفانہ اور پائیدار بنانے کی ضرورت پر زور دیا۔