کراچی (رائیٹ ناوٴ نیوز): پاکستان کاٹن جنرز ایسوسی ایشن کی تازہ ترین رپورٹ کے مطابق 15 نومبر تک روئی کی آمد 4.4 ملین گانٹھوں سے تجاوز کر گئی ہے، مگر یہ رفتار گزشتہ دو مالی سالوں کے مقابلے میں کم ہے۔ اس وقت تک عموماً سالانہ پیداوار کا بڑا حصہ آچکا ہوتا ہے، تاہم اس سال پنجاب میں پیداوار میں کمی دیکھی گئی ہے جبکہ سندھ کی کارکردگی بھی متاثر ہوئی ہے۔

پنجاب میں 31 اکتوبر سے 15 نومبر تک پیداوار میں اضافہ گزشتہ سال کے مقابلے میں تقریباً نصف رہا۔ سندھ میں بھی کوئی نمایاں بہتری نہیں آئی۔ گندم کی بوائی اور دیگر عوامل کے باعث روئی کی پیداوار میں مزید اضافہ ممکن نہیں دکھائی دیتا۔

پاکستان میں جب تک پنجاب 3 ملین گانٹھوں کی پیداوار حاصل نہیں کرتا، مجموعی پیداوار 6 ملین گانٹھوں تک نہیں پہنچ سکتی۔ موجودہ سیزن کی رفتار کو دیکھتے ہوئے، پیداوار 5 سے 5.5 ملین گانٹھوں کے درمیان رہنے کا خدشہ ہے۔

کچھ لوگوں کا خیال ہے کہ مقامی پیداوار کی کمی درآمدات کو ضروری بنا سکتی ہے، لیکن یہ صنعت کی بہتری کا ثبوت نہیں۔ اگر روئی کی طلب کا دارومدار بیرونی سپلائی پر ہے، تو مسئلہ مارکیٹ کی غیر یقینی صورتحال ہے۔