الٹرا پراسیس فوڈز کے استعمال سے 12 دائمی امراض کا خطرہ بڑھ گیا ہے، نئی تحقیق میں انکشاف۔
لندن: (رائیٹ ناوٴ نیوز) نئی تحقیق میں انکشاف ہوا ہے کہ الٹرا پراسیس غذاؤں کے استعمال سے ذیابیطس ٹائپ 2، امراض قلب، ڈپریشن، الزائمر اور کینسر سمیت 12 دائمی امراض کا خطرہ بڑھ جاتا ہے۔
تحقیق، جو جرنل دی لانسیٹ میں شائع ہوئی، میں بتایا گیا کہ یہ غذائیں دنیا بھر میں مقبولیت اختیار کر رہی ہیں اور ان کے استعمال سے مختلف طبی مسائل کا خطرہ بڑھ رہا ہے۔
الٹرا پراسیس غذائیں بنانے کے دوران بار بار پراسیس کی جاتی ہیں اور ان میں نمک، چینی اور مصنوعی اجزا کی مقدار زیادہ ہوتی ہے جبکہ غذائی اجزا جیسے فائبر کی مقدار کم ہوتی ہے۔
ان غذاؤں میں ڈبل روٹی، فاسٹ فوڈز، مٹھائیاں، ٹافیاں، کیک، نمکین اشیا، بریک فاسٹ سیریلز، چکن اور فش نگٹس، انسٹنٹ نوڈلز، میٹھے مشروبات اور سوڈا شامل ہیں۔
تحقیق میں کہا گیا ہے کہ ان غذاؤں کے استعمال سے وزن بڑھتا ہے، جس کے نتیجے میں مختلف امراض جیسے گردوں کے امراض، شریانوں کے امراض، ہائی بلڈ پریشر اور موٹاپے کا خطرہ بڑھ جاتا ہے۔
