اسلام آباد: (رائیٹ ناوٴ نیوز) پاکستان میں زہریلے آئل اور سیسہ پر مبنی پینٹس کی فروخت گزشتہ تین سالوں میں نصف سے زائد کم ہوئی ہے، لیکن ان کا مارکیٹ شیئر اب بھی 41 فیصد پر برقرار ہے جو انسانی صحت کے لیے خطرہ ہے۔ حکومتی اور غیر حکومتی اداروں کے حکام نے جمعرات کو ایک پریس کانفرنس میں اس بات پر زور دیا کہ سیسہ کے استعمال کو محفوظ سطح پر لانے کے لیے مزید کوششوں کی ضرورت ہے۔

عبید حسن، کنٹری مینیجر لیڈ ایکسپوژر الیمنیشن پروجیکٹ (LEEP) نے کہا کہ سیسہ پر مبنی پینٹ پاکستان کے صحت کے اہم مسائل میں سے ایک ہے، خصوصاً بچوں پر اس کے اثرات شدید ہیں۔ عالمی ادارہ صحت کے مطابق، یہ بچوں کی ذہنی نشوونما کو متاثر کرتا ہے اور بالغوں میں ہائپرٹینشن اور دل کی بیماریوں کا سبب بنتا ہے۔

پاکستان میں تقریباً 47 ملین بچے سیسہ کے زہریلے اثرات سے متاثر ہیں، جس سے سالانہ 38 ارب ڈالر کا معاشی نقصان ہوتا ہے۔ تحقیق کے مطابق، 2021 سے 2024 کے درمیان گھر میں استعمال ہونے والے آئل بیسڈ لیڈ پینٹ کے مارکیٹ شیئر میں 88 فیصد سے 41 فیصد تک کمی آئی ہے۔

پاکستان اسٹینڈرڈز اینڈ کوالٹی کنٹرول اتھارٹی (PSQCA) کی ڈائریکٹر جنرل، ڈاکٹر سیدہ ضیا بتول نے کہا کہ PSQCA زہریلے پینٹس کی روک تھام کے لیے معیاری قوانین کی پابندی کو یقینی بناتا ہے۔ پاکستان کوٹنگ ایسوسی ایشن (PCA) کے نمائندے محمد یوسف نے بتایا کہ کم لاگت متبادل خام مال کی دستیابی نے سیسہ کے استعمال کو کنٹرول کرنے میں مدد کی ہے۔