پشاور: (رائیٹ ناؤ نیوز) وزیراعلیٰ خیبرپختونخوا سہیل آفریدی نے ہزارہ ڈویژن کے لیے 200 ارب روپے کے ترقیاتی پیکج کا اعلان کیا ہے۔ انہوں نے مانسہرہ میں میڈیکل کالجز، نرسنگ کالج، اور ٹراما سینٹر کے قیام کا وعدہ بھی کیا۔

ان کا کہنا تھا کہ 200 ارب میں سے 50 ارب روپے سیاحتی منصوبوں پر خرچ ہوں گے۔ تناول فیڈر اور اوگی روڈ کی تعمیر اور تناول و دربند تحصیلوں کے فعال ہونے کا بھی اعلان کیا گیا۔

خیبرپختونخوا کو تجربات کی لیبارٹری بنانے پر تنقید کرتے ہوئے انہوں نے کہا کہ غریب عوام نقصان اٹھا رہے ہیں۔ انہوں نے عمران خان کے نظریے کی حمایت میں اپنی جان دینے کی بات بھی کی۔

سہیل آفریدی نے کہا کہ عمران خان کی قیادت میں پورے ملک کو بند کرنے کے لیے تیار ہیں۔ ان کا کہنا تھا کہ وہ اپنے لیڈر کی ہر ہدایت پر عمل کریں گے اور کسی اور کی بات نہیں سنیں گے۔

واضح رہے کہ وزیراعلیٰ نے پارٹی کارکنان کو یقین دلایا کہ وہ عمران خان اور عوام کے اعتماد کو ٹھیس نہیں پہنچائیں گے۔ عمران خان نے پہلی مرتبہ مڈل کلاس کے نمائندے کو وزارت اعلیٰ کی کرسی پر بٹھایا ہے۔