اسلام آباد: (رائیٹ ناؤ نیوز) وزیر خزانہ محمد اورنگزیب نے کہا ہے کہ معاشی بہتری کے لیے کتابی باتوں کی بجائے عملی اقدامات کیے جا رہے ہیں۔ انہوں نے کیپٹل مارکیٹ ڈیولپمنٹ فنڈ کی تقریب سے خطاب کرتے ہوئے کہا کہ پاکستان کی قیادت خطے میں امن کے قیام کے لیے مؤثر سفارتکاری کر رہی ہے۔

وزیر خزانہ نے کہا کہ موجودہ علاقائی کشیدگی کے باوجود پاکستان کی معیشت درست سمت میں گامزن ہے۔ انہوں نے بتایا کہ پاکستان اسٹاک مارکیٹ مستحکم رہی ہے اور اصلاحات کی بدولت سرمایہ کاروں کا اعتماد بحال ہو رہا ہے۔

محمد اورنگزیب نے ملکی ترقی کے لیے مقامی سرمایہ کاری کے فروغ پر زور دیا اور نجی شعبے کی حوصلہ افزائی کی اہمیت بتائی۔ انہوں نے کہا کہ کیپٹل مارکیٹ کا استحکام معیشت کی بہتری کے لیے ناگزیر ہے۔

وزیر خزانہ نے توانائی کے متبادل ذرائع جیسے سولر، ونڈ اور ہائیڈرو پاور کی طرف منتقلی کو ضروری قرار دیا۔ انہوں نے مالیاتی نظم و ضبط اور استحکام حکومت کی اولین ترجیحات میں شامل ہونے کی بات کی۔

واضح رہے کہ حکومت ریگولیٹری اصلاحات کے لیے مکمل سپورٹ فراہم کر رہی ہے اور سیکیورٹیز اینڈ ایکسچینج کمیشن آف پاکستان کے کردار کو اہم قرار دیا گیا ہے۔ وزیر خزانہ نے عالمی معیار کے مطابق پاکستانی مارکیٹ کو ڈھالنے کی ضرورت پر بھی زور دیا۔