ڈیونڈِن: (رائیٹ ناوٴ نیوز) زمبابوے ویمنز ٹیم کی اوپنر کیلس نڈھلوو نیوزی لینڈ کے خلاف دوسرے ایک روزہ میچ میں باؤنسر لگنے سے زخمی ہوگئیں۔ اتوار کو یونیورسٹی اول گراؤنڈ میں کیوی بولر بری الِنگ کے باؤنسر کو چھوڑنے کے دوران گیند ان کے ہیلمٹ پر لگی۔

گیند لگتے ہی نڈھلوو زمین پر گِر گئیں اور فوری طور پر میڈیکل اسٹاف نے ان کا معائنہ کیا، جس کے بعد انہیں ایمبولینس میں اسپتال منتقل کیا گیا۔

زمبابوے کی نگراں ہیڈ کوچ کیٹ ابراہیم نے میچ کے بعد کہا کہ نڈھلوو اب جواب دے رہی ہیں اور صحتیاب ہو رہی ہیں؛ اسکینز کے نتائج کا انتظار ہے۔