تہران: (رائیٹ ناوٴ نیوز) ایران کے وزیر خارجہ سید عباس عراقچی اور چین کے وزیر خارجہ وانگ یی کے درمیان ٹیلیفونک رابطہ ہوا جس میں دوطرفہ امور اور خطے کی صورتحال پر تبادلہ خیال کیا گیا۔ چینی وزیر خارجہ نے آیت اللہ علی خامنہ ای کی شہادت پر تعزیت کا اظہار کیا، جو امریکا اور اسرائیل کے ایران پر فوجی حملے کے دوران پیش آئی۔

سید عباس عراقچی نے چینی ہم منصب کے تعزیتی پیغام پر شکریہ ادا کیا اور ایران اور خطے کی تازہ صورتحال سے آگاہ کیا۔ انہوں نے کہا کہ امریکا اور اسرائیل نے فوجی کارروائی کے دوران بین الاقوامی قوانین کی خلاف ورزی کی اور سیکڑوں ایرانی شہری جاں بحق ہوئے۔

ایرانی وزیر خارجہ نے کہا کہ ایرانی مسلح افواج قومی خودمختاری اور شہریوں کے تحفظ کے لیے دفاع جاری رکھیں گی۔ انہوں نے میناب کے اسکول میں 171 بچیوں کی ہلاکت اور اسپتالوں پر حملوں پر عالمی برادری سے ردعمل کی ضرورت پر زور دیا۔

چینی وزیر خارجہ نے ایران کی خودمختاری کے دفاع کی حمایت کی اور امریکا و اسرائیل کی کارروائی کو غیر قانونی قرار دیا۔ دونوں رہنماؤں نے جنگ کے دوران قونصلر تعاون پر بھی بات چیت کی۔