تل ابیب/تہران: (رائیٹ ناوٴ نیوز) اسرائیلی فضائیہ نے دعویٰ کیا ہے کہ اس نے امریکا کے ساتھ مشترکہ کارروائی میں ایران پر ایک ہی دن میں 1,200 سے زائد بم گرائے ہیں۔ اسرائیلی فضائیہ کے مطابق مختلف فوجی اہداف کو نشانہ بنایا گیا، مگر ایران کے جنوبی صوبے ہرمزگان کے شہر مناب میں ایک گرلز پرائمری اسکول بھی حملے کی زد میں آیا۔

رپورٹس کے مطابق اس واقعے میں کم از کم 148 افراد جاں بحق اور درجنوں زخمی ہوئے ہیں۔ ایران کے وزیر خارجہ عباس عراقچی نے الزام عائد کیا ہے کہ اسکول پر حملے میں درجنوں معصوم بچے مارے گئے اور خبردار کیا کہ یہ کارروائی بغیر جواب کے نہیں رہے گی۔

خطے میں بڑھتی ہوئی کشیدگی کے باعث عالمی برادری میں تشویش پائی جا رہی ہے اور صورتحال مزید سنگین ہونے کا خدشہ ظاہر کیا جا رہا ہے۔