باغ: (رائیٹ ناوٴ نیوز) وزیراعظم محمد شہباز شریف نے کہا ہے کہ پاکستان نے بھارت کے خلاف چار روزہ جنگ میں زبردست کامیابی حاصل کی اور جلد معاشی میدان میں بھی کامیابی حاصل کرے گا۔ شہباز شریف نے آزاد جموں و کشمیر کے شہر ہاڑی گہل باغ میں دانش سکول کے سنگ بنیاد کی تقریب سے خطاب کرتے ہوئے کہا کہ مئی میں بھارت سے جنگ ہوئی اور افواج پاکستان نے زبردست کارکردگی دکھائی۔

وزیراعظم نے کہا کہ امریکی صدر نے بھی پاکستان کی کامیابی کو تسلیم کیا ہے اور امریکی کانگرس کی رپورٹ نے بھی اس کی تصدیق کی ہے۔ انہوں نے مزید کہا کہ اللہ نے پاکستان کو عزت سے نوازا ہے اور افواج پاکستان کی بہادری کو سراہا۔

انہوں نے دانش سکول کے متعلق کہا کہ یہ پنجاب سے شروع ہوا اور پورے ملک میں پھیل رہا ہے۔ محکمہ تعلیم کو ہدایت دی گئی ہے کہ 23 مارچ 2026 کو باغ میں دانش سکول کا افتتاح کیا جائے گا۔

وزیراعظم نے کہا کہ مقبوضہ جموں و کشمیر کو بھی آزادی چاہیے اور پاکستان سفارتی سطح پر کشمیریوں کے حقوق کے لئے آواز بلند کرتا رہے گا۔ وزیراعظم آزادکشمیر فیصل ممتاز راٹھور نے امید ظاہر کی کہ کشمیریوں کو حق خودارادیت ضرور ملے گا۔