کراچی: (رائیٹ ناوٴ نیوز) پاکستانی اداکارہ عشنا شاہ نے وزیر اعلیٰ پنجاب مریم نواز کو کھلا خط لکھا ہے جس میں انہوں نے صوبے میں جانوروں کے خلاف تشدد کے واقعات پر فوری اقدامات کا مطالبہ کیا ہے۔

انسٹاگرام پر اپنے پیغام میں، عشنا شاہ نے وزیر اعلیٰ کی قیادت میں خواتین کے تحفظ، صفائی اور امن و امان سے متعلق اقدامات کی تعریف کی، مگر جانوروں پر تشدد کے معاملے پر خاموشی پر تشویش کا اظہار کیا۔ انہوں نے حالیہ وائرل ویڈیو کا حوالہ دیا جس میں ایک کتے کو گاڑی سے باندھ کر سڑک پر گھسیٹتے دکھایا گیا، اور کہا کہ ایسے واقعات پنجاب کا منفی تاثر پیدا کر رہے ہیں۔

عشنا شاہ نے جانوروں کو "اللہ کی مخلوق” قرار دیا اور ان کی حفاظت کے لیے مختلف تجاویز پیش کیں، جن میں نس بندی پروگرام، جانوروں کے تحفظ کے قوانین پر عملدرآمد، گدھا گاڑیوں کی ضابطہ بندی، جنگلی جانوروں کی پالتو رکھنے پر پابندی، کتوں کی لڑائی کا خاتمہ اور چڑیا گھروں کو پناہ گاہوں میں تبدیل کرنا شامل ہیں۔

اداکارہ نے اپنے خط میں کہا کہ اگر صوبائی حکومت اس معاملے پر عملی اقدام اٹھائے تو پنجاب ملک بھر کے لیے مثال بن سکتا ہے۔ سوشل میڈیا پر ان کے بیان کے بعد جانوروں کے تحفظ کے قوانین پر عملدرآمد سے متعلق بحث شروع ہو گئی ہے۔

پچھلے دنوں صوبے میں جانوروں پر تشدد کے مختلف واقعات کی ویڈیوز سوشل میڈیا پر گردش کرتی رہی ہیں، جن کے بعد شہری حلقوں کی جانب سے سخت کارروائی کا مطالبہ کیا جا رہا ہے۔