دمشق: (رائیٹ ناوٴ نیوز) شام کی وزارتِ دفاع نے اعلان کیا ہے کہ اس نے شمال مشرقی علاقے الشددادی میں امریکی فوجی اڈے کا کنٹرول سنبھال لیا ہے۔ یہ اقدام امریکی افواج کے اڈے سے نکلنے کے بعد عمل میں آیا۔

امریکی افواج اس اڈے پر داعش کے خلاف بین الاقوامی اتحاد کے حصے کے طور پر موجود تھیں۔ اس علاقے میں کرد فورسز نے داعش کے ارکان کو قید رکھا تھا۔

امریکا نے حال ہی میں التنف اڈہ بھی خالی کر دیا ہے اور شام کی نئی حکومت سے تعلقات میں پیش رفت کی ہے۔

امریکی وزیرخارجہ کے مطابق، امریکا شام کی موجودہ صورتحال سے مطمئن ہے، تاہم شامی حکام کو داخلی مفاہمت کے لیے مزید معاہدے کرنے ہوں گے۔

ماہرین کے مطابق، امریکی اڈوں کی واپسی اور شامی افواج کی پیش قدمی خطے میں طاقت کے توازن میں اہم تبدیلی کی نشاندہی کرتی ہے۔