تہران: (رائیٹ ناوٴ نیوز) ایران کے نائب وزیر خارجہ مجید تخت روانچی نے اعلان کیا ہے کہ اگر امریکا اقتصادی پابندیاں ختم کرنے پر آمادہ ہو تو ایران جوہری معاہدے کے لیے سمجھوتے پر غور کر سکتا ہے۔ انہوں نے جنیوا میں امریکا اور ایران کے درمیان جوہری مذاکرات کے دوسرے دور کی تصدیق کی ہے۔

ایران نے میزائل پروگرام کو جوہری مذاکرات سے جوڑنے کی مخالفت کی ہے اور بتایا ہے کہ اقتصادی پابندیوں کے خاتمے کے بدلے وہ جوہری پروگرام پر بعض پابندیاں قبول کر سکتا ہے۔ ایران کے جوہری ادارے کے سربراہ نے عندیہ دیا ہے کہ ایران افزودہ یورینیم کو کم سطح پر لانے کا سوچ سکتا ہے بشرطیکہ مالی پابندیاں ختم ہوں۔

یاد رہے کہ 2015 کے جوہری معاہدے کے تحت ایران نے جوہری پروگرام کو محدود کیا تھا، تاہم صدر ٹرمپ نے امریکا کو اس معاہدے سے الگ کر لیا تھا۔ امریکا نے ایران سے یورینیم کی افزودگی محدود کرنے کا مطالبہ کیا ہے جبکہ ایران اس کی تردید کرتا ہے کہ وہ جوہری ہتھیار بنانے کی کوشش کر رہا ہے۔