بیجنگ: (رائیٹ ناوٴ نیوز) چین نے قومی سلامتی کے خدشات کے پیش نظر امریکی اور اسرائیلی سائبر سیکیورٹی سافٹ ویئر کے استعمال پر پابندی عائد کر دی ہے۔ چینی حکام کو اندیشہ ہے کہ یہ سافٹ ویئر حساس معلومات کو بیرونِ ملک منتقل کر سکتے ہیں، اس لیے مقامی متبادل اپنانے کی پالیسی پر عمل جاری ہے۔

امریکی کمپنیوں میں براڈکام کی وی ایم ویئر، پالو آلٹو نیٹ ورکس اور فورٹینیٹ شامل ہیں، جبکہ اسرائیلی کمپنیوں میں چیک پوائنٹ سافٹ ویئر ٹیکنالوجیز کا ذکر ہے۔ اس فیصلے کے بعد امریکی کمپنیوں کے شیئرز میں کمی ریکارڈ کی گئی۔

چینی تجزیہ کاروں کے مطابق بیجنگ کو مغربی ٹیکنالوجی کے ہیک ہونے کا خطرہ ہے، اسی لیے چین خود انحصاری کی جانب بڑھ رہا ہے۔ مقامی سائبر سیکیورٹی کمپنیوں میں 360 سیکیورٹی ٹیکنالوجی اور نیوسافٹ شامل ہیں۔

امریکا نے اینویڈیا کو کچھ شرائط کے ساتھ چین میں مصنوعی ذہانت چپس فروخت کرنے کی اجازت دی ہے، تاہم جدید پروسیسرز کی فروخت پر پابندی برقرار ہے۔ چینی حکومت مقامی AI چپس کے استعمال کی حوصلہ افزائی کر رہی ہے۔