برلن: (رائیٹ ناوٴ نیوز) جرمنی کے اعلیٰ فوجی افسر نے انکشاف کیا ہے کہ ایک خاص پیراٹروپ یونٹ میں مبینہ جنسی تشدد، دائیں بازو کی انتہاپسندی اور منشیات کے استعمال کے اسکینڈل نے فوج میں ہلچل مچا دی ہے۔ جنرل کارسٹن بروئر نے برلن میں کہا کہ مسلح افواج میں ایسے رویے قابل قبول نہیں ہیں۔

جنرل بروئر نے پارلیمانی دفاعی کمیٹی کے سامنے رپورٹ پیش کی اور کہا کہ اس نوعیت کا رویہ رکھنے والے فوجی اہلکار افسر کی حیثیت سے خدمات انجام دینے کے اہل نہیں۔ یہ اسکینڈل اس وقت سامنے آیا جب چھبیسویں پیراٹروپ رجمنٹ کی خواتین فوجیوں نے مبینہ بدسلوکی کی شکایات کیں۔

مذکورہ رجمنٹ نے سوڈان سے شہریوں کے انخلا جیسے مشن بھی مکمل کیے ہیں۔ یہ معاملہ ایسے وقت میں سامنے آیا جب جرمن حکومت فوج کی تعداد بڑھانے کے لیے نوجوانوں کی رجسٹریشن شروع کر رہی ہے۔ یہ اقدام نیٹو اتحادیوں کے امریکی مطالبے کے تناظر میں کیا جا رہا ہے کہ وہ اپنے براعظم کے دفاع کا زیادہ بوجھ خود اٹھائیں۔