اسلام آباد: (رائیٹ ناؤ نیوز) اسلام آباد ہائیکورٹ نے نئے ججز کی تعیناتی میں تاخیر پر صدر مملکت، وزیراعظم اور وزارت قانون کو نوٹس جاری کیا ہے۔ عدالت نے ایک روز میں جواب طلب کرلیا ہے۔

عدالت عالیہ کے جسٹس ارباب محمد طاہر نے کہا ہے کہ سمری کس مرحلے پر رکی ہوئی ہے؟ کل تک جواب دیں۔ حکومت پر ذمہ داری پوری کرنے کی امید تھی، لیکن ایسا نہیں ہوا۔

سماعت کے دوران جسٹس ارباب محمد طاہر نے وفاقی حکومت پر شدید برہمی کا اظہار کیا اور کہا کہ حکومت کیا کر رہی ہے؟ لگتا ہے وفاقی حکومت کو کوئی دلچسپی نہیں ہے۔

جسٹس نے کہا کہ سندھ اور پشاور ہائیکورٹ کے ججز کی کنفرمیشن بھی رکی ہوئی ہے۔ 18 دن گزر چکے ہیں۔ سمری کو یوں پڑا نہیں رہنے دیا جا سکتا۔

یاد رہے کہ درخواست گزار کے وکیل نے کہا کہ آئین واضح ہے کہ وقت گزر جائے تو کیا ہوگا؟ ایڈیشنل اٹارنی جنرل نے کہا کہ صدر اب سمری مسترد نہیں کر سکتے۔ عدالت نے منگل تک سماعت ملتوی کردی۔