اسلام آباد: (رائٹ ناؤ نیوز) وفاقی وزیر برائے پیٹرولیم علی پرویز ملک نے اعلان کیا ہے کہ ترکش پیٹرولیم پاکستان کے سمندروں میں آف شور ڈرلنگ کا آغاز کرنے جا رہی ہے۔ اس اقدام کے نتیجے میں ملک میں بڑی سرمایہ کاری کی امید ہے۔

لاہور میں ایک تقریب کے دوران علی پرویز ملک نے کہا کہ مسلم لیگ ن عملی سیاست پر یقین رکھتی ہے اور ان کی حکومت نے ملک کو ایٹمی قوت بنا کر ناقابل تسخیر بنایا۔ انہوں نے مزید کہا کہ نواز شریف کی قیادت میں کئی نمایاں کامیابیاں حاصل ہوئیں۔

وفاقی وزیر نے زور دیا کہ ایران امریکا جنگ کے دوران پاکستان نے خطے میں امن کے ضامن کے طور پر اہم کردار ادا کیا۔ انہوں نے کہا کہ مکہ مشترکہ معاہدے پر پوری قوم کو فخر ہے اور سعودی عرب، ترکی اور پاکستان کی مشترکہ قوت خطے کے استحکام میں اہم کردار ادا کرتی ہے۔

علی پرویز ملک نے پاکستان کی مسلح افواج کی مہارتوں کی تعریف کی اور کہا کہ ایران امریکا جنگ کے دوران معاشی چیلنجز کا سامنا رہا، لیکن وزیر اعظم شہباز شریف کی قیادت میں ملک ترقی کی راہ پر گامزن ہے۔ انہوں نے کہا کہ معاشی میدان میں مزید کامیابیاں حاصل کرنا ہمارا اگلا ہدف ہے۔

واضح رہے کہ حکومت نے محدود وسائل کے باوجود عوام کو ریلیف فراہم کرنے اور تیل کی قیمتوں کو کنٹرول کرنے کی کوشش کی ہے۔ پیٹرول کی قلت نہیں ہونے دی گئی جبکہ ہمسایہ ممالک میں شناختی کارڈ پر 2 لیٹر پیٹرول دیا جا رہا ہے۔