بیروت: (رائیٹ ناوٴ نیوز) اسرائیلی فوج نے جنوبی لبنان کے شہریوں کو حکم دیا ہے کہ وہ فوری طور پر اپنے گھروں سے نکل کر دریائے لیتانی کے شمال میں منتقل ہو جائیں۔ فوج کے عربی زبان کے ترجمان نے شہریوں کو اپنی حفاظت کے لیے علاقہ چھوڑنے کی تاکید کی ہے۔

ترجمان کے مطابق جو افراد دریائے لیتانی کے جنوب کی طرف جائیں گے وہ خطرے میں پڑ سکتے ہیں۔ اسرائیلی فوج نے انتباہ کیا ہے کہ حزب اللہ کے ارکان یا ان کی تنصیبات کے قریب موجود افراد بھی خطرے میں ہوں گے۔

لبنان کی وزیر سماجی امور حنین سید نے بتایا کہ اسرائیلی حملوں کے باعث 65,000 سے زائد افراد بے گھر ہو چکے ہیں اور مزید 10,000 سے 20,000 افراد نقل مکانی کر چکے ہیں۔ یہ افراد مختلف پناہ گاہوں میں رجسٹرڈ ہو رہے ہیں جبکہ کئی افراد اپنے رشتہ داروں یا دوستوں کے ساتھ عارضی طور پر رہائش پذیر ہیں۔

حنین سید نے مزید کہا کہ 2024 کی اسرائیل لبنان جنگ کی یادیں اب بھی تازہ ہیں۔ حکومت نے حزب اللہ کی فوجی سرگرمیوں کو غیر قانونی قرار دیتے ہوئے ملک میں ریاستی عمل داری کے عزم کا اظہار کیا ہے۔