واشنگٹن: (رائیٹ ناوٴ نیوز) امریکی خفیہ ایجنسی سی آئی اے نے ایرانی شہریوں کو جاسوسی کے لیے بھرتی کرنے کے مقصد سے سوشل میڈیا پر فارسی زبان میں پیغام جاری کیا ہے۔ اس پیغام میں ایرانی شہریوں کو محفوظ طریقے سے رابطہ کرنے کی ہدایات دی گئی ہیں۔ یہ اقدام مشرق وسطیٰ میں امریکی فوجی موجودگی کے اضافے اور امریکا و ایران کے درمیان جاری جوہری مذاکرات کے پس منظر میں کیا گیا ہے۔

سی آئی اے نے یہ پیغام ایکس، انسٹاگرام، فیس بک، ٹیلی گرام اور یوٹیوب پر جاری کیا ہے، جس میں ایرانی شہریوں کو ہدایت کی گئی ہے کہ وہ رابطہ کرتے وقت اپنی حفاظت کا خاص خیال رکھیں۔ پیغام میں کہا گیا کہ دفتری کمپیوٹر یا ذاتی موبائل فون استعمال نہ کریں، بلکہ ممکن ہو تو نیا عارضی ڈیوائس استعمال کریں۔

مزید برآں، پیغام میں کہا گیا کہ اردگرد کے ماحول پر نظر رکھیں اور اس بات کا خیال کریں کہ کوئی ان کی سرگرمی دیکھ نہ سکے۔ رابطے کے لیے قابل اعتماد ورچوئل پرائیویٹ نیٹ ورک استعمال کرنے کا مشورہ دیا گیا ہے، جس کا صدر دفتر روس، ایران یا چین میں نہ ہو، یا ٹور نیٹ ورک استعمال کیا جائے۔

امریکی صدر ڈونلڈ ٹرمپ نے حالیہ تقریر میں کہا ہے کہ امریکا ایران کو جوہری ہتھیار حاصل کرنے کی اجازت نہیں دے گا۔ اگر مذاکرات ناکام ہوئے تو ممکنہ کارروائی پر غور کیا جا سکتا ہے۔

تجزیہ کاروں کا کہنا ہے کہ سی آئی اے کا یہ پیغام سفارتی کوششوں اور ممکنہ دباؤ کی حکمت عملی کا حصہ ہو سکتا ہے۔