تہران: (رائیٹ ناوٴ نیوز) ایران کے وزیر خارجہ عباس عراقچی نے کہا ہے کہ ایران اگلے دو سے تین روز میں امریکا کے ساتھ ممکنہ جوہری معاہدے کا ابتدائی مسودہ تیار کر لے گا۔ ان کا کہنا تھا کہ اس مسودے کو اعلیٰ ایرانی قیادت کی منظوری کے بعد امریکی صدر کے خصوصی ایلچی کو پیش کیا جائے گا۔

عباس عراقچی نے مزید کہا کہ مثبت پیش رفت کے باوجود حتمی معاہدے کے لیے مزید مذاکرات کی ضرورت ہو سکتی ہے۔ انہوں نے واضح کیا کہ بعض تکنیکی اور قانونی نکات پر مزید مشاورت درکار ہے تاکہ معاہدہ قابلِ عمل اور پائیدار ہو سکے۔

واشنگٹن میں امریکی صدر ڈونلڈ ٹرمپ نے عندیہ دیا ہے کہ ایران پر معاہدے کے لیے دباؤ بڑھانے کی غرض سے محدود فوجی کارروائی پر غور کر رہے ہیں۔ انہوں نے تہران کو 10 سے 15 دن کی مہلت دیتے ہوئے کہا کہ اگر معاہدہ نہ ہوا تو سنگین نتائج بھگتنے پڑ سکتے ہیں۔