اسلام آباد: (رائیٹ ناوٴ نیوز) صدر مملکت آصف علی زرداری نے چینی سال کے آغاز پر چین کی حکومت اور عوام کو مبارکباد دیتے ہوئے کہا ہے کہ پاکستان اور چین کے درمیان تعلقات باہمی احترام اور اعتماد پر مبنی ہیں۔ انہوں نے کہا کہ پاکستان کی ون چائنا پالیسی اور چین کا مسئلہ کشمیر پر پاکستان کے اصولی موقف کی حمایت ان دونوں ممالک کی دوستی کی مضبوطی کا ثبوت ہے۔

صدر مملکت نے نئے چینی سال کو خوش بختی، توانائی اور ترقی کا سال قرار دیا اور کہا کہ 2026 دونوں ممالک کے درمیان سفارتی تعلقات کی 75ویں سالگرہ بھی ہے۔

آصف علی زرداری نے کہا کہ پاکستان اور چین کی دوستی تاریخ میں مضبوط جڑوں پر مبنی ہے، اور دونوں ممالک نے ہمیشہ ایک دوسرے کے بنیادی قومی مفادات پر حمایت کی ہے۔

انہوں نے مزید کہا کہ چین کے صدر شی جن پنگ کی قیادت میں چین علاقائی اور عالمی امور میں اہم کردار ادا کر رہا ہے، اور پاکستان اس کردار کو قدر کی نگاہ سے دیکھتا ہے۔

صدر مملکت نے کہا کہ چین پاکستان اقتصادی راہداری بنیادی ڈھانچے کی ترقی اور دونوں ممالک کے درمیان روابط کو آگے بڑھا رہی ہے، اور پاکستان اس کی مکمل صلاحیت سے فائدہ اٹھانے کے لئے پُرعزم ہے۔