ممبئی: (رائیٹ ناوٴ نیوز) شاہ رخ خان کی اہلیہ اور معروف انٹیریئر ڈیزائنر گوری خان نے اپنے تقریباً ایک صدی پرانے آبائی گھر کو جدید طرز کے لگژری ریزورٹ میں تبدیل کر دیا ہے۔ یہ ریزورٹ بھارت کے خوبصورت پہاڑی مقام ڈلہاؤسی میں واقع ہے اور اس میں قیام کی قیمت ایک لاکھ 20 ہزار روپے رکھی گئی ہے۔

گوری خان، جو کہ عالمی شہرت یافتہ اداکار کی شریک حیات ہیں، نے اپنی الگ شناخت بطور انٹیریئر ڈیزائنر قائم کی ہے اور متعدد مشہور شخصیات کے گھروں کو منفرد انداز میں ڈیزائن کیا ہے۔ انہوں نے اپنے ذاتی گھر منت کی سجاوٹ میں بھی اپنی تخلیقی صلاحیتوں کا بھرپور اظہار کیا۔

1933 میں تعمیر ہونے والی اس خاندانی جائیداد کو جدید سہولیات سے آراستہ کرتے ہوئے 6 کمروں پر مشتمل ایک شاندار ولا کی شکل دی گئی ہے، جہاں عام افراد بھی قیام کر سکتے ہیں اور قدرتی مناظر سے لطف اندوز ہو سکتے ہیں۔

اس منصوبے میں گوری خان کی کزن رستم تیواڑی نے بھی ان کا ساتھ دیا، جبکہ یہ جائیداد ان کے ماموں تیجندر تیواڑی کی ملکیت ہے۔ یہ وہی جگہ ہے جہاں گوری خان نے اپنے بچپن کی کئی یادگار تعطیلات گزاری تھیں۔