واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے ایران میں حکومت کی تبدیلی کو بہترین حل قرار دیا ہے اور فوجی دباؤ بڑھانے کے لیے مشرق وسطیٰ میں دوسرا طیارہ بردار بحری جہاز بھیجنے کا حکم دیا ہے۔ ٹرمپ نے فورٹ بریگ میں صحافیوں سے گفتگو کرتے ہوئے کہا کہ ایران میں حکومت کی تبدیلی بہترین چیز ہوگی۔

ٹرمپ نے ایرانی سپریم لیڈر علی خامنہ ای کے ممکنہ جانشین کے بارے میں کچھ نہیں کہا، تاہم انہوں نے ایران کی جوہری پروگرام پر معاہدہ کرنے کی خواہش ظاہر کی۔ امریکی بحری جہاز یو ایس ایس جیرالڈ آر فورڈ کو مشرق وسطیٰ بھیجنے کا اعلان کرتے ہوئے ٹرمپ نے کہا کہ اگر معاہدہ نہیں ہوتا تو ہمیں اس کی ضرورت ہوگی۔

ایران میں حالیہ احتجاج کے دوران ہزاروں افراد کی ہلاکت کی اطلاعات پر ٹرمپ نے امریکہ کی حمایت کا عندیہ دیا تھا، تاہم اب ان کے بیانات کا مرکز ایران کا جوہری پروگرام بن گیا ہے۔ ایران اور امریکہ کے درمیان عمان میں جوہری مذاکرات ہوئے، تاہم کوئی نئی ملاقات طے نہیں ہوئی۔

ٹرمپ نے اسرائیلی وزیراعظم بنیامین نیتن یاہو سے ملاقات کے بعد ایران کے ساتھ مذاکرات جاری رکھنے کی خواہش ظاہر کی ہے، جبکہ مغربی حکومتوں کو شبہ ہے کہ ایران کا جوہری پروگرام بم بنانے کے لئے ہے، جس کی ایران تردید کرتا ہے۔