اسلام آباد: (رائیٹ ناوٴ نیوز) وفاقی وزیر پارلیمانی امور طارق فضل چودھری نے کہا ہے کہ پی ٹی آئی بانی کی صحت پر سیاست کرنا مجرمانہ ہے اور حکومت ان کا ہر ممکن علاج کرائے گی۔ انہوں نے کہا کہ بانی کی تکلیف کو سیاسی رنگ دینا غلط ہے اور جیل حکام کے کہنے پر پمز ہسپتال میں علاج ہوا۔

میڈیا سے گفتگو کرتے ہوئے طارق چودھری نے کہا کہ کسی قیدی کی دیکھ بھال نہ ہو تو حکومت ذمہ دار ہے، اور بانی پی ٹی آئی سے کوئی ذاتی دشمنی نہیں، صرف سیاسی اختلافات ہیں۔ پی ٹی آئی نے ان اختلافات کو ذاتی دشمنی کا رنگ دیا ہے۔

طارق چودھری نے مزید کہا کہ ایک سپر سپیشلسٹ نے بانی کی صحت پر رپورٹ مرتب کی اور چیف جسٹس خود اس کیس کے نگران ہیں۔ جہاں ضرورت ہوگی بانی کی آنکھ کا معائنہ ہوگا اور بہترین ڈاکٹروں سے علاج کرایا جائے گا۔

انہوں نے کہا کہ یہ حساس معاملہ ہے اور حقائق کو توڑ مروڑ کر پیش کرنا مجرمانہ غفلت ہے۔ احتجاج پارلیمنٹیرینز کا حق ہے لیکن اس کیس کو سیاسی انداز میں نہ اچھالا جائے اور نہ سیاست کی جائے۔