کراچی: (رائیٹ ناوٴ نیوز) وفاقی وزیر مذہبی امور سردار محمد یوسف نے کہا ہے کہ حاجیوں کو زیادہ سے زیادہ سہولیات دینے کی کوششوں میں اضافہ کیا جا رہا ہے۔ انہوں نے حاجی کیمپ کا دورہ کیا جہاں ڈائریکٹر حج سید امتیاز علی شاہ اور دیگر افسران بھی موجود تھے۔ سردار محمد یوسف نے کہا کہ حاجیوں کی ٹریننگ کا پہلا مرحلہ مکمل ہو چکا ہے جبکہ دوسرا مرحلہ رمضان المبارک کے بعد ہوگا تاکہ سعودی عرب میں حاجیوں کو کوئی تکلیف نہ ہو۔

انہوں نے مزید کہا کہ سندھ سے 29 ہزار حاجی کراچی سے روانہ ہوں گے جن میں سے 24 ہزار کو ٹریننگ دی جا چکی ہے۔ وفاقی وزیر نے کہا کہ 2026 میں حاجیوں کو مزید سہولیات فراہم کی جائیں گی۔

سردار محمد یوسف نے محمد بن سلمان کا شکریہ ادا کرتے ہوئے کہا کہ 2025 میں بہتر انتظامات پر ایوارڈ بھی دیا گیا۔ انہوں نے تحریک انصاف کی حکومت کی کارکردگی پر تنقید کرتے ہوئے کہا کہ پی ٹی آئی نے نیا پاکستان بنانے کا دعویٰ کیا تھا لیکن وہ پرانے کو بھی تباہ کر چکے ہیں۔

مزید براں، سردار محمد یوسف نے نئے صوبوں کے قیام کی بات کرتے ہوئے کہا کہ صوبہ ہزارہ بنانا چاہتے ہیں اور اس پر کے پی کے اسمبلی نے تین بار قرارداد منظور کی ہے۔