لاہور: (رائیٹ ناوٴ نیوز) لاہور ہائیکورٹ میں ماحولیاتی آلودگی سے متعلق کیس کی سماعت کے دوران جسٹس شاہد کریم نے کہا کہ درخت کاٹنے والے ملزمان کی ضمانتیں نہیں ہونی چاہئیں۔ عدالت نے ایڈووکیٹ جنرل پنجاب کو آئندہ سماعت پر ذاتی حیثیت میں پیش ہونے کا حکم دیا۔

ممبر جوڈیشل واٹر کمیشن سید کمال حیدر نے عدالت کو بتایا کہ درختوں کی کٹائی سے متعلق فیصلے کمیشن کی مشاورت سے ہوں گے۔ جسٹس کریم نے پی ایچ اے کے وکیل کے تاخیر سے پیش ہونے پر برہمی کا اظہار کیا۔

پنجاب یونیورسٹی کے وکیل نے بتایا کہ درخت کاٹنے کے معاملے پر کمیٹی تشکیل دی گئی ہے اور مزید درخت لگانے کا منصوبہ ہے۔ عدالت نے میاواکی طرز پر جنگل لگانے کی ہدایت دی۔

عدالت نے کہا کہ درخت کاٹنے والے ملزمان کی ضمانت روکنے کے لیے قانون میں ترمیم کی جائے۔ عدالت نے 16 فروری کو عمل درآمد رپورٹ طلب کی ہے۔