اسلام آباد: (رائیٹ ناوٴ نیوز) وزیراعظم شہباز شریف نے کہا ہے کہ آبی ذخائر کا تحفظ قومی، ماحولیاتی اور سماجی فلاح کے لیے ناگزیر ہے۔ آبی ذخائر کے عالمی دن پر اپنے پیغام میں انہوں نے کہا کہ یہ دن پاکستان اور دنیا بھر کے لیے آبی ذخائر کے دیرپا تحفظ کے عزم کے اعادہ کا موقع فراہم کرتا ہے۔

وزیراعظم نے کہا کہ پاکستان 1971ء کے آبی ذخائر کے عالمی معاہدے کا رکن ہے، جو آبی ذخائر کے استعمال اور تحفظ کو اجاگر کرتا ہے۔ شہباز شریف نے کہا کہ قابلِ بھروسا آبی ذخائر ماحولیاتی اور معاشی مسائل سے نبرد آزما ہونے میں کلیدی کردار ادا کرتے ہیں۔

انہوں نے مزید کہا کہ آبی ذخائر، بشمول جھیلیں اور گلیشیئرز، حیاتیاتی تنوع کے تحفظ، ماحولیاتی تغیر سے بچاؤ اور پانی کے مؤثر نظم و نسق میں مددگار ہیں۔ آبی ذخائر میں کمی لوگوں کے روزگار اور خوراک کی قیمتوں پر اثر ڈال سکتی ہے۔

وزیراعظم نے کہا کہ آبی ذخائر کا تحفظ محض موسمیاتی تغیر سے بچاؤ کے لیے نہیں بلکہ سماجی فلاح و بہبود کے لیے بھی ضروری ہے۔ پاکستان انڈس واٹرز ٹریٹی 1960 کے منصفانہ نفاذ پر یقین رکھتا ہے۔

شہباز شریف نے عالمی سطح پر آبی ذخائر کے منصفانہ، قانونی اور پرامن استعمال کے فروغ کی ضرورت پر زور دیا۔