اسلام آباد: (رائیٹ ناوٴ نیوز) سپریم کورٹ نے واضح کیا ہے کہ وزیراعظم کی جانب سے دیا گیا کوئی غیر قانونی حکم سول سرونٹس پر لازم نہیں۔

سپریم کورٹ میں او جی ڈی سی ایل میں غیر قانونی بھرتیوں کے کیس کی سماعت ہوئی، جس میں سپریم کورٹ نے سابق وزیر کی نظرثانی درخواست پر وکلاء کو تیاری کی ہدایت کی۔ عدالت نے کہا کہ تقرری کے لیے اشتہار دیا جاتا ہے، کوئی بادشاہی حکم نہیں۔ نیب کے وکیل نے بتایا کہ وزیر کے پرنسپل اسٹاف آفیسر نے نوکریوں کے لیے پارلیمنٹ کے دباؤ کا ذکر کیا۔

جسٹس ہاشم کاکڑ نے کہا کہ ہر سرکاری ادارے میں گنجائش سے زیادہ بھرتیاں ہیں اور پی آئی اے کی صورتحال انٹرنیشنل ائیر لائنز سے مختلف ہے۔ زیادہ بھرتیوں کی وجہ سے پی آئی اے کی نجکاری کرنی پڑی۔

جسٹس اشتیاق ابراہیم نے کہا کہ جس وقت بھرتیاں کی گئیں اس وقت احتساب کمیشن کا قانون نافذ نہیں تھا۔ متعلقہ وفاقی وزیر سزا بھگت چکے ہیں، کیا یہ کافی نہیں؟