اسپوٹائفائی کی 2025 کی رپورٹ میں طلحہ انجم پاکستان کے سب سے زیادہ سنے جانے والے گلوکار قرار دیے گئے، جبکہ مقامی موسیقی کی سٹریمنگ میں 70 فیصد اضافہ ہوا۔
کراچی: (رائیٹ ناوٴ نیوز) اسپوٹائفائی کی 2025 کی سالانہ رپورٹ کے مطابق، طلحہ انجم مسلسل دوسری بار پاکستان کے سب سے زیادہ سنے جانے والے مقامی گلوکار قرار پائے ہیں۔
رپورٹ کے مطابق، اس سال پاکستان میں مقامی موسیقی کی سٹریمنگ میں 70 فیصد اضافہ ہوا ہے، جس سے ظاہر ہوتا ہے کہ سننے والے زیادہ تر پاکستانی فنکاروں کی تخلیقات کو ترجیح دے رہے ہیں۔
پاکستان کی ٹاپ 10 آرٹسٹس کی فہرست میں طلحہ انجم کے علاوہ عمیر اور حسن رحیم بھی شامل ہیں، جبکہ عاطف اسلم اور نصرت فتح علی خان کی مقبولیت بھی برقرار رہی۔
سال 2025 کے سب سے زیادہ سنے جانے والے گانوں میں "جھول”، "پل پل” اور "ماند” شامل ہیں، جبکہ البمز کی فہرست میں "سفر” سرفہرست رہا۔ ہپ ہاپ البمز جیسے "مای ٹیرِبل مائنڈ” اور "اوپن لیٹر” نے بھی نمایاں مقبولیت حاصل کی۔
پاکستانی موسیقی کا منظرنامہ زیادہ متحرک، متنوع اور جدید رجحانات کی طرف بڑھ رہا ہے، جس میں نوجوان نسل ہپ ہاپ اور جدید موسیقی کو ترجیح دے رہی ہے، تاہم روایتی اور کلاسیکی موسیقی کی اہمیت بھی برقرار ہے۔
