تہران: (مہرخبررساں ایجنسی) سپاہ پاسداران انقلاب اسلامی نے خلیج فارس میں جاری جنگی مشق کے دوران امریکی بحری جہازوں کو سخت وارننگ دی ہے۔ یہ وارننگ 2016 میں شہید ہونے والے کمانڈر محمد ناظری سے منسوب دو روزہ مشق کے دوران دی گئی۔

مشق خلیج فارس، آبنائے ہرمز، بحیرہ عمان اور جزائر ابوموسیٰ، تنب بزرگ، تنب کوچک اور جزیرہ سیر کے سمندری حدود میں ہو رہی ہے۔ پاسداران کے بحری یونٹس نے خطے میں موجود امریکی جنگی جہازوں کو واضح پیغام پہنچایا۔

اس مشق میں جدید فضائی دفاعی میزائل نظام اور الیکٹرانک وارفیئر کے آلات استعمال کیے گئے۔ ایرانی ساختہ نظام مصنوعی ذہانت کے ذریعے اہداف کی شناخت اور نشانہ بنانے کی صلاحیت رکھتے ہیں۔

یہ جنگی مشق سپاہ پاسداران کی جنگی صلاحیتوں اور دفاعی نظاموں کی کارکردگی کو ظاہر کرنے کے لیے ترتیب دی گئی ہے، جس میں میزائل، ڈرون، نگرانی اور مصنوعی ذہانت پر مبنی آپریشن شامل ہیں۔

منتظمین کے مطابق، یہ مشق پڑوسی ممالک کے لیے امن کا پیغام جبکہ دشمنوں کے لیے واضح انتباہ اور ایران کی دفاعی حکمت عملی کی مکمل قوت کو ظاہر کرتی ہے۔