اسلام آباد: (رائیٹ ناوٴ نیوز) مسابقتی کمیشن آف پاکستان (سی سی پی) نے انشورنس سیکٹر میں ٹیکس مسائل پر گہری تشویش کا اظہار کیا ہے، جن میں وفاقی اور صوبائی سیلز ٹیکس شامل ہیں، جو کاروبار کرنے کی لاگت میں اضافہ اور انشورنس انڈسٹری پر ٹیکس بوجھ ڈال رہے ہیں۔

سی سی پی نے انشورنس کمپنیوں کے سخت نگرانی کی سفارش کی ہے، جس کے لیے سیکورٹیز اینڈ ایکسچینج کمیشن آف پاکستان (ایس ای سی پی) کو ذمہ داری دی گئی ہے، خاص طور پر ری انشورنس کے معاملات میں۔

سی سی پی نے اپنی رپورٹ میں انشورنس اور ری انشورنس خدمات پر قابل اطلاق سیلز ٹیکس کے مسائل کو اجاگر کیا ہے۔ انشورنس پریمیم کو سیلز ٹیکس سے استثنیٰ حاصل ہے، جس کا فائدہ صارفین کو کم پریمیم کی صورت میں منتقل کیا جا سکتا ہے۔

پاکستان میں انشورنس انڈسٹری پر وفاقی اور صوبائی سیلز ٹیکس لاگو ہوتا ہے۔ عام طور پر سامان پر سیلز ٹیکس وفاقی ٹیکس ہوتا ہے جبکہ خدمات پر سیلز ٹیکس صوبائی ہوتا ہے۔ وفاقی حکومت ایف بی آر کے ذریعے سامان کی فروخت اور سپلائی پر سیلز ٹیکس وصول کرتی ہے۔

صوبائی حکومتیں اپنے علاقوں میں خدمات پر سیلز ٹیکس لگاتی ہیں۔ انشورنس خدمات جیسے زندگی اور صحت کی انشورنس کو بعض صورتوں میں استثنیٰ دیا گیا ہے تاکہ ملک میں انشورنس کی طلب کو بڑھایا جا سکے۔

سی سی پی نے ٹیکس مسائل کو کاروبار کی لاگت میں اضافے، انشورنس انڈسٹری پر بوجھ اور انٹری و کارکردگی کی رکاوٹ قرار دیا ہے۔