اسلام آباد: (رائیٹ ناوٴ نیوز) وفاقی وزیر قانون اعظم نذیر تارڑ نے کہا ہے کہ جیل قوانین کے مطابق کسی بھی سزا یافتہ قیدی سے سیاسی ملاقات ممکن نہیں ہے۔

اعظم نذیر تارڑ اور وفاقی وزیر اطلاعات عطا تارڑ نے اڈیالہ جیل میں بانی پاکستان تحریک انصاف سے سیاسی ملاقاتوں کے حوالے سے وضاحت پیش کی۔ انہوں نے ایک مشترکہ پریس کانفرنس میں کہا کہ بانی پی ٹی آئی 190 ملین پاؤنڈ کیس میں سزایافتہ ہیں اور ان کو جیل میں تمام سہولیات میسر ہیں، تاہم سیاسی ملاقاتوں پر پابندی ہوگی۔

عطا تارڑ نے بتایا کہ بانی پی ٹی آئی کی تینوں بہنیں 9 مئی کو کور کمانڈر ہاؤس کے باہر موجود تھیں، اور قانون کی خلاف ورزی پر سخت کارروائی کی جائے گی۔

انہوں نے کہا کہ جیل کے اندر بعض افراد ریاست کے خلاف سازشیں کر رہے ہیں، اور ریاست نے فیصلہ کیا ہے کہ جیل کے باہر امن و امان کو برقرار رکھنے کے لیے سخت اقدامات کیے جائیں گے۔

مزید برآں، وزیر قانون نے کہا کہ چیف آف ڈیفنس فورسز کی تعیناتی کے حوالے سے وزارت دفاع کام کر رہی ہے، اور اس معاملے میں کوئی ابہام نہیں ہونا چاہیے۔