ماسکو: (رائیٹ ناوٴ نیوز) روس کے ایک معروف ایتھلیٹ نے دعویٰ کیا ہے کہ انہوں نے 5900 فٹ کی بلندی پر فٹبال میچ کھیل کر نیا عالمی ریکارڈ قائم کیا ہے۔ یہ میچ 1800 میٹر کی بلندی پر ایک ہاٹ ایئر بیلون میں منعقد کیا گیا، جہاں وہ اور ان کی ٹیم فضاء میں معلق چھوٹے سے گراؤنڈ میں فٹبال کھیلتے رہے۔

سوشل میڈیا پر جاری ویڈیوز میں دیکھا جا سکتا ہے کہ کھلاڑی بیلون کی ٹوکری میں گیند کو احتیاط سے ایک دوسرے کی طرف پاس کر رہے ہیں، جبکہ پس منظر میں زمین کا دلفریب نظارہ ہے۔ ساتھ ہی ایک طیارہ مسلسل بیلون کے گرد چکر لگا رہا ہے۔

روسی ایتھلیٹ کا کہنا ہے کہ یہ دنیا میں پہلی بار ہوا ہے کہ فٹبال کا باقاعدہ کھیل اتنی زیادہ بلندی پر کسی ہاٹ ایئر بیلون میں کھیلا گیا ہو۔ ان کے مطابق یہ کارنامہ جسمانی مہارت اور اعصابی مضبوطی کا ثبوت ہے، کیونکہ تیز ہوا اور محدود جگہ کھیل کو مزید مشکل بنا دیتی ہے۔

ان کے اس دعوے نے انٹرنیٹ صارفین کو حیران کر دیا ہے۔ بہت سے لوگ اسے بہادری اور جدت کی مثال قرار دے رہے ہیں، جبکہ کچھ اسے غیر ضروری خطرہ مول لینے کے مترادف کہہ رہے ہیں۔ تاہم، یہ تجربہ منفرد اور دنیا بھر کی توجہ کا مرکز بن گیا ہے۔