نیویارک: (رائیٹ ناوٴ نیوز) اقوامِ متحدہ کے ترقیاتی پروگرام کی تازہ رپورٹ میں خبردار کیا گیا ہے کہ آرٹیفیشل انٹیلیجنس (اے آئی) ٹیکنالوجی امیر اور غریب کے درمیان فرق میں اضافہ کر سکتی ہے۔ رپورٹ کے مطابق، اگر بروقت مناسب اقدامات نہ کیے گئے تو اے آئی کے فوائد زیادہ تر امیر ممالک تک محدود رہیں گے جبکہ پسماندہ ممالک بنیادی ضروریات اور جدید ٹیکنالوجی تک رسائی سے محروم رہ جائیں گے۔

رپورٹ نے اس صورتحال کا موازنہ صنعتی انقلاب کے دور کی "عظیم انشعاب” سے کیا ہے، جب مغربی ممالک نے تیز رفتار ترقی کی۔ رپورٹ کے مصنف مائیکل متھوکرشنا نے کہا کہ ٹیکنالوجی کے بجائے انسان کو پہلے ترجیح دینی چاہیے۔

رپورٹ کے مطابق، جہاں لوگ بنیادی تعلیم، بجلی اور انٹرنیٹ تک رسائی کے لیے جدوجہد کر رہے ہیں، وہ اے آئی کی دوڑ میں پیچھے رہ جائیں گے۔ اقوامِ متحدہ کے ماہرین نے حکومتوں کو ڈیجیٹل انفراسٹرکچر، تعلیم و تربیت، اور سماجی تحفظ پر سرمایہ کاری کی ترغیب دی ہے۔