اسلام آباد: (رائیٹ ناوٴ نیوز) پاکستان نے اسرائیل سے غزہ سمیت تمام مقبوضہ فلسطینی علاقوں سے مکمل انخلا کا مطالبہ کیا ہے۔ وزیراعظم شہباز شریف اور صدر آصف علی زرداری نے فلسطینی عوام کے عالمی یکجہتی دن پر اپنے پیغامات میں غزہ میں جاری اسرائیلی جارحیت کے خاتمے اور انسانی امداد کی بلا رکاوٹ فراہمی پر زور دیا۔ انہوں نے کہا کہ اسرائیلی افواج کی طرف سے جنگی جرائم کا مکمل احتساب ہونا چاہیے۔

غزہ میں 7 اکتوبر 2023 سے جاری اسرائیلی جارحیت کے نتیجے میں ہزاروں فلسطینی جاں بحق ہو چکے ہیں اور بنیادی ڈھانچہ تباہ ہو گیا ہے۔ 10 اکتوبر 2025 کو فائر بندی کے باوجود اسرائیل کی جانب سے حملے جاری ہیں۔ وزیراعظم اور صدر نے فلسطینی عوام کے جائز حقوق اور ان کی آزاد ریاست کے قیام کی حمایت کا اعادہ کیا۔

صدر مملکت آصف علی زرداری نے فلسطینی عوام کو خراج تحسین پیش کیا اور مسجد اقصیٰ میں نماز ادا کرنے کی خواہش ظاہر کی۔ وزیراعظم نے غیر قانونی اسرائیلی آبادکاریوں کی مذمت کی اور کہا کہ یہ بین الاقوامی قوانین کی خلاف ورزی اور امن کی راہ میں رکاوٹ ہیں۔