کراچی: (رائیٹ ناوٴ نیوز) استعمال شدہ موبائل فون خریدنا آج کل عام ہوگیا ہے، لیکن اگر احتیاط نہ کی جائے تو نقصان کا سامنا کرنا پڑ سکتا ہے۔ بہتر اور محفوظ خریداری کے لیے چند اہم نکات پر غور کرنا ضروری ہے۔

سب سے پہلے فون کا آئی ایم ای آئی نمبر چیک کریں۔ *#06# ڈال کر آئی ایم ای آئی نمبر دیکھیں اور متعلقہ ویب سائٹ پر تصدیق کریں کہ فون چوری شدہ یا بلاک نہ ہو۔

فون کی باڈی، اسکرین اور فریم کا اچھی طرح معائنہ کریں۔ ڈنٹس، خراشیں یا اسکرین لیک جیسے نشانات فون کے گرنے یا مسئلہ زدہ ہونے کی نشاندہی کرتے ہیں۔

بیٹری ہیلتھ چیک کریں۔ آئی فونز میں سیٹنگز میں بیٹری ہیلتھ نظر آتی ہے جبکہ اینڈرائیڈ فونز میں مختلف ایپس سے چیک کیا جا سکتا ہے۔

چارجر اور لوازمات کی جانچ کریں۔ اصل کمپنی کا چارجر بہتر ہوتا ہے جبکہ غیر معیاری چارجر نقصان دہ ہوسکتا ہے۔

فون کے تمام فنکشنز جیسے کیمرہ، اسپیکر، مائیک، فنگرپرنٹ، فیس ان لاک، کال اور ایس ایم ایس کو چیک کریں۔

نیٹ ورک اور انٹرنیٹ کی تصدیق کریں، سیم کارڈ لگا کر کال ملائیں اور انٹرنیٹ چلائیں۔ وائی فائی اور موبائل ڈیٹا دونوں چیک کریں۔

فون کی اصل اسٹوریج اور ریم چیک کریں تاکہ سافٹ ویئر کے ذریعے غلط معلومات نہ دکھائی جائیں۔

ہمیشہ معتبر دکان یا جاننے والے سے خریداری کریں تاکہ بعد میں کوئی مسئلہ نہ ہو۔

ان نکات پر عمل کرکے استعمال شدہ موبائل خریدنا محفوظ، فائدہ مند اور کم خرچ ثابت ہوتا ہے۔