ممبئی: (رائیٹ ناوٴ نیوز) بھارتی کرکٹ بورڈ نے سابق کپتان روہت شرما کو ہدایت کی ہے کہ وہ اپنے مستقبل کے تبصروں کے بجائے اپنی فٹنس اور کارکردگی پر توجہ دیں۔

روہت شرما، جو ون ڈے میں بھارت کے تیسرے سب سے زیادہ رنز اسکورر ہیں، نے آسٹریلیا کے خلاف حالیہ سیریز میں شاندار کارکردگی کا مظاہرہ کیا تھا۔ انہوں نے اس سیریز میں ایک سنچری اور ایک نصف سنچری اسکور کی اور سب سے زیادہ رنز بنانے والے کھلاڑی رہے۔

اب روہت شرما جنوبی افریقا کے خلاف تین ایک روزہ میچوں کی سیریز میں بھی شرکت کریں گے جو 30 نومبر سے شروع ہو رہی ہے۔

بھارتی کرکٹ بورڈ نے روہت شرما کو واضح پیغام دیا ہے کہ وہ اپنے جارحانہ کھیل کی طرف واپس آئیں جو آسٹریلیا کے خلاف سیریز میں نظر نہیں آیا تھا۔

بھارتی میڈیا کے مطابق بی سی سی آئی نے کہا ہے کہ روہت شرما اور ویرات کوہلی کے کردار کو واضح کرنا ضروری ہے تاکہ وہ بے یقینی کی حالت میں نہ کھیلیں۔