نیویارک: (رائیٹ ناوٴ نیوز) امریکی میڈیا کی اطلاعات کے مطابق مقبول ایکشن کامیڈی فلم سیریز ‘رش آور’ کا چوتھا حصہ تیار کیے جانے کی خبریں سامنے آئی ہیں۔ فلم ساز ادارہ پیراماؤنٹ اس منصوبے پر غور کر رہا ہے اور اطلاعات کے مطابق سابق امریکی صدر ڈونلڈ ٹرمپ نے بھی اس میں کردار ادا کیا ہے۔

مبینہ طور پر ٹرمپ نے پیراماؤنٹ کے اہم حصص دار لیری ایلیسن سے ہدایتکار بریٹ ریٹنر کے حق میں بات چیت کی، جنہوں نے 1998 میں پہلی ‘رش آور’ فلم ڈائریکٹ کی تھی۔

سالوں سے چوتھے حصے کے متعلق افواہیں گردش میں تھیں۔ جیکی چن نے 2022 میں تصدیق کی تھی کہ فلم کی تیاری کے حوالے سے بات چیت جاری ہے۔

بریٹ ریٹنر پر 2017 میں متعدد اداکاراؤں کی جانب سے ہراسانی کے الزامات لگے تھے، جنہیں انہوں نے مسترد کر دیا تھا۔

رپورٹس کے مطابق ‘رش آور 4’ کی کاسٹ حتمی نہیں، لیکن امکان ہے کہ جیکی چن اور کرس ٹکر اپنے معروف کرداروں میں واپس آئیں گے۔