لاہور: (رائیٹ ناوٴ نیوز) وزیراعلیٰ مریم نواز شریف نے صفائی کی ناقص کارکردگی پر ستھرا پنجاب کنٹریکٹر کی ادائیگی معطل کرنے کا فیصلہ کیا ہے۔ انہوں نے کہا کہ غیر معیاری کارکردگی پر کسی کو رعایت نہیں ملے گی۔

اعلیٰ سطحی اجلاس میں ڈپٹی کمشنرز کی کارکردگی جانچنے کے لیے خفیہ ٹیمیں بھیجنے کا فیصلہ کیا گیا۔ مریم نواز نے نجی ٹھیکیداروں کو وارننگ دی اور کنٹریکٹس کی تنظیمِ نو پر غور کیا۔

اجلاس میں آوارہ کتوں کے واقعات اور اسپتالوں میں ادویات کی عدم فراہمی پر ڈپٹی کمشنرز کو سرزنش کی گئی۔ وزیراعلیٰ نے شہروں میں صفائی اور تجاوزات کے خاتمے کے لیے سخت ہدایات جاری کیں۔

انہوں نے شہروں کی خوبصورتی کے لیے شجرکاری اور پبلک ٹوائلٹس کی صفائی کے احکامات جاری کیے۔ ضلعی انتظامیہ کی ناقص کارکردگی پر تبدیلی کی دھمکی بھی دی۔

مریم نواز نے عوامی خدمت میں غفلت برداشت نہ کرنے کا عزم دہرایا اور کہا کہ ہر انتظامی اقدام عوامی سہولت کے تحت ہوگا۔