مظفرگڑھ: (رائیٹ ناوٴ نیوز) آزاد امیدوار اقبال خان پتافی نے مظفرگڑھ میں دستخط شدہ اور مہر لگے بیلٹ پیپرز دکھا دیے۔ اقبال پتافی نے کہا کہ مختلف پولنگ اسٹیشنز میں بیلٹ پیپرز کی تعداد کم ہے اور پریزائیڈنگ افسران کا دعویٰ ہے کہ انہیں کم تعداد میں بیگز ملے ہیں۔

اقبال پتافی نے الزام لگایا کہ اگر پریزائیڈنگ افسران نے بیلٹ پیپرز گم نہیں کیے تو انہیں لکھ کر دیں۔ بعض افسران نے لکھ کر دیا کہ ان کے پاس بیلٹ پیپرز کم ہیں۔ اقبال پتافی نے کہا کہ کچھ افراد پولنگ اسٹیشنز میں اپنی جیبوں میں بیلٹ پیپرز لے کر آئے تھے۔

اقبال پتافی نے مبینہ طور پر بیلٹ پیپرز کے ساتھ پکڑے گئے افراد کی ویڈیو بھی شیئر کی اور کہا کہ ان افراد کو پولیس کے حوالے کیا گیا لیکن کوئی قانونی کارروائی نہیں ہوئی۔

اقبال پتافی نے مزید کہا کہ کئی پولنگ اسٹیشنز پر سینکڑوں بیلٹ پیپرز کم ہیں اور ریٹرننگ آفیسر کو اس معاملے میں ملوث قرار دیا۔ انہوں نے الیکشن کمیشن سے ذمہ داروں کے خلاف کارروائی کی توقع کا اظہار کیا۔

اقبال پتافی نے خبردار کیا کہ اگر ذمہ داروں کے خلاف کارروائی نہ ہوئی تو حالات کی ذمہ دار انتظامیہ ہوگی۔