اسلام آباد: (رائیٹ ناوٴ نیوز) پاکستان نے نیدرلینڈز کے ساتھ جی ایس پی پلس اسکیم کے تحت یورپی مارکیٹ تک منصفانہ رسائی کے لیے اہم تجارتی مسائل اٹھائے ہیں۔ وفاقی وزیر تجارت اور سیکرٹری کامرس کی نیدرلینڈز کے سفیر رابرٹ یان سیگرٹ سے ملاقات میں ایتھنول مراعات کی واپسی اور باسمتی چاول کی جغرافیائی نشانی کے تنازعے پر تحفظات کا اظہار کیا گیا۔

سیکرٹری کامرس جواد پال نے کہا کہ پاکستان یورپی یونین کی جی ایس پی پلس اسکیم کی پابندی کے لیے پرعزم ہے۔ انہوں نے ایتھنول مراعات کی واپسی پر بھی تشویش کا اظہار کیا اور نیدرلینڈز کے سفیر سے درخواست کی کہ وہ اس اپیل پر غور کریں۔

وفاقی وزیر تجارت جام کمال خان نے دوطرفہ تجارت میں تنوع کی ضرورت پر زور دیا اور برآمدات کے مواقع کو بہتر بنانے کی اہمیت پر روشنی ڈالی۔ انہوں نے خدمات کے شعبے کی اہمیت اور ڈیجیٹل مالیاتی انضمام میں جاز ٹیلی کام کے کردار کو بھی سراہا۔

نیدرلینڈز کے سفیر نے نئے مواقع کی تلاش کے لیے باقاعدہ مذاکرات شروع کرنے کی تاریخوں پر تبادلہ خیال کیا۔ انہوں نے پاکستان میں غیرملکی سرمایہ کاروں کی حوصلہ افزائی کے لیے بہتر معاشی حالات کی امید ظاہر کی۔

پاکستان اور یورپی یونین کے درمیان ساتویں اسٹریٹیجک ڈائیلاگ میں دونوں فریقوں نے تجارتی تعلقات کو مزید مضبوط کرنے کی اہمیت پر زور دیا۔ دونوں فریقوں نے عالمی چیلنجز کے حوالے سے مشترکہ تعاون کے عزم کا اعادہ کیا۔