کراچی: (رائیٹ ناوٴ نیوز) سندھ کے وزیر بلدیات ناصر حسین شاہ نے کہا ہے کہ ای چالان صرف کراچی کے لیے ہے اور جرمانے کم نہیں کیے جائیں گے۔

کراچی میں میڈیا سے گفتگو کرتے ہوئے ناصر حسین شاہ نے بتایا کہ سندھ سالڈ ویسٹ بورڈ کی میٹنگ میں ڈویژنل بورڈ کو فعال کرنے کی بات ہوئی ہے اور کراچی کی صفائی و ستھرائی پر زور دیا گیا ہے۔ انہوں نے مزید کہا کہ گھروں سے کچرا اٹھانے کا سلسلہ جاری رہنا چاہیے۔

ناصر حسین نے کہا کہ ایم کیو ایم اپنی طاقت بڑھانے کے لیے بیانات دے رہی ہے۔ انہوں نے ایم کیو ایم اور جماعت اسلامی سے رابطہ کیا ہے اور کہا کہ ایم کیو ایم نے نئے صوبے کا شوشہ چھوڑا تھا۔

انہوں نے مزید کہا کہ لوکل گورنمنٹ کو بااختیار بنایا جا رہا ہے اور ایم کیو ایم نے بلدیاتی انتخابات سے راہ فرار کیوں اختیار کی۔ انہوں نے پی ٹی آئی پر بھی تنقید کی کہ پنجاب میں بلدیاتی نظام ختم کر دیا گیا تھا۔

گزشتہ دنوں یہ خبر سامنے آئی تھی کہ سندھ میں ای چالان کے جرمانوں کی رقم میں کمی کرنے کے حوالے سے بات چیت جاری ہے، تاہم ناصر حسین شاہ نے واضح کیا کہ جرمانے کم نہیں کیے جائیں گے۔