لندن: (رائیٹ ناوٴ نیوز) برطانوی وزیرِ اعظم کیئر اسٹارمر کی قیادت میں 40 ممالک آبنائے ہرمز کو دوبارہ کھولنے کے لیے متحرک ہیں۔ ماہرین کے مطابق ایران کی رضامندی کے بغیر یہ اہم بحری گزرگاہ بحال کرنا مشکل ہے۔

آبنائے ہرمز کی ناکہ بندی کی وجہ سے عالمی تیل اور گیس کی ترسیل متاثر ہوئی ہے۔ امن کے زمانے میں دنیا کے 20 فیصد تیل کی سپلائی اسی راستے سے ہوتی ہے۔

ایران نے یہ ناکہ بندی امریکا اور اسرائیل کے حملوں کے بعد کی، جس سے تیل کی قیمتیں 100 ڈالر فی بیرل سے تجاوز کر گئیں۔

برطانیہ نے اس صورتحال سے نمٹنے کے لیے 40 سے زائد ممالک کا ورچوئل اجلاس منعقد کیا، جس میں فرانس، جرمنی، کینیڈا اور دیگر ممالک نے شرکت کی۔

یاد رہے کہ ایران نے آبنائے ہرمز پر کنٹرول کو تسلیم کرنے کی شرط رکھی ہے اور صرف چند دوست ممالک کو اجازت دی ہے۔ ماہرین کے مطابق 40 ملکی اتحاد کی کامیابی ایران کے ساتھ معاہدے پر منحصر ہے۔