بغداد: (رائیٹ ناوٴ نیوز) بغداد میں امریکی سفارت خانے نے امریکی شہریوں کو ہدایت کی ہے کہ وہ عراق سے فوراً نکل جائیں۔ ممکنہ حملوں کے خطرے کی وجہ سے آئندہ 24 سے 48 گھنٹوں کے دوران بغداد میں خطرات بڑھ گئے ہیں۔

امریکی سوشل میڈیا پلیٹ فارم ایکس پر جاری کردہ سیکیورٹی الرٹ میں بتایا گیا کہ ایران کے اتحادی عراقی ملیشیا امریکی شہریوں اور مفادات کو نشانہ بنانے کی منصوبہ بندی کر رہی ہے۔

ممکنہ اہداف میں امریکی کمپنیاں، یونیورسٹیاں، سفارتی سہولیات، توانائی کا بنیادی ڈھانچہ، ہوٹل اور ہوائی اڈے شامل ہیں۔ ساتھ ہی عراقی ادارے اور امریکا سے منسلک سمجھے جانے والے شہری مقامات بھی ممکنہ نشانے پر ہیں۔

سفارت خانے نے مزید کہا کہ ملیشیاؤں نے پہلے بھی امریکیوں کو اغوا کیا ہے، لہذا شہریوں کو فوراً ملک چھوڑنے کی تاکید کی گئی ہے۔

واضح رہے کہ بغداد میں امریکی شہریوں کے لیے پہلے بھی سیکیورٹی خطرات رہے ہیں اور موجودہ صورتحال نے ان خطرات کو مزید بڑھا دیا ہے۔